مش باقي مني





قصيده للشاعر جمال بخيت ...

ما اجملها واجمل تعبيرات الجراح المصريه التي تعبر عنها هذه القصيده

ربما نشرت من قبل .... في بعض المدونات الصديقه وربما قراناها اكثر من مره

ولكن في كل مره اجد فيها الدمع الذي يخرج من عيني

اجد فيها الاسى ...فانا استأذن من نشرها من قبل في مدونته ان انشرها هنا

حتى اساهم لو بالقليل....في التعبير عن مأسي هذا البلد الجميل

والقصيده هي

مش باقي مني غير شوية ضي ف عينيا

أنا هاديهوملك

وامشي بصبري ف الملكوت

يمكن ف نورهم تلمحي خطوة

تفرق معاكي

بين الحياة والموت

مش باقي مني غير شوية نبض ف عروقي

خُدي.. وعيشي..

وافتحي لي تابوت

أفرح بريحة ورد فرعوني

وربنا ف عوني

إذا دخلت الجنة ولاّ النار

هاشتاق إلي ضحكتك

وقعدتي ف الدار

والقهوة متحوجة

من طيبة العطار..

ف كل يوم الصبح

باشرب حليب قبطي

وف النهار والمسا

بامسك ستار الكعبة لو سبتي

واثبت إذا هربتي

أهديكي عمري وحسي وجوارحي

أهديكي جرحي

هو اللي باقي ف دنيتي لما خلص فرحي

مش باقي مني

غير شوية لحم ف كتافي

بلاش يتبعتروا ف البحر

بلاش يتحرقوا ف قطر الصعيد

ف العيد

بلاش لكلب الصيد.. تناوليهم

خدي اللي باقي من الأمل فيهم

وابني لي من عضمهم

في كل حارة مقام

وزوريني مرة وحيدة

لو كل ألفين عام

ألم الجراح يتلم

مش باقي مني غير شوية دم

متلوثين بالهم

مُرين وفيهم سم

كانوا زمان شربات

والنكتة سكرهم

شربتهم الخفافيش

في قلب أوكارهم

مش باقي مني غير شوية دم.. ماأقدرشي

أسقيكي.. مواجعهم

وبرضه ما أقدرشي

أرميكي..

وأبيعهم

يمكن ف مرة تعوزي تطلبيني شهيد

هاحتاج يوميها الدم

يمضي علي شهادتي

مش باقي مني

غير شوية قوة ف إرادتي

علي شوية شِعر من خطي

حاسبي عليهم وانتي بتخطي

وانتي ف صبح الدلال

بتعطري شطي..

مش باقي مني

غير شوية ضي ف عينيا

أنا مش عايزهم

لو كنت يوم هالمحك

وانتي بتوطي

في معركة مافيهاش

ولاطيارات ولاجيش

وانتي ف طابور العيش

بتبوسي إيد الزمن

ينولك لقمة

من حقك المشروع

مش باقي مني.. غير

شهقة ف نفس مقطوع..

بافتح لها سكة

ما بين رئة.. وضلوع..

ما بين غبار.. ودموع..

وأنا تحت حجر «المقطم»

ف الدويقة باموت

أنا.. والعطش.. والجوع..

يئن تحتي التراب

وانا صوتي مش مسموع..

ياحلمنا الموجوع..

من المرور ممنوع..

مستني لما يمر

موكب سلاطينك..

مش باقي مني

غير شوية رحمة من طينك..

علي شوية صبر من دينك..

مش باقي مني غير حبة غُنا تايهين

ف الضلمة مش لاقيين

حس الفواعلية..

ولا صوت مراكبي عَفي

فوق المعدية..

ولا صوت بناتي العذاري

في كل صبحية..

والغنوة.. أمنية

«ياما نفسي أقابل حبيبي..

وانا ع الزراعية»..

صوتك وصوتهم غاب..

وانا تحت حجر المقطم.. باموت لوحديّا..

الليلة راحت عيوني

تطل ع البستان..

وجناين الرمان..

رجعت لي توصف عناد الغل والدخان

وسحابة سودا تضلل

علي الغُنا الغلبان..

رجعت لي توصف هبوب الموت

علي الألوان..

رجعت لي توصف..

.. خيال الذل..

ف موائد الرحمن..

مش باقي مني غير شوية كُفر بشروقك

وأنا..

منبع الايمان..

مش باقي مني..

غير شوية ضي..

وعينيا

مش قادرة تلمحني..

في وحدتي محني..

خايف أموت م الخوف

والضعف يفضحني..

...

السجن عشش ف قلبي

وماشي ف شوارعك..

نفس اللي باعني وخدعني

بالرخيص بايعك..

هاشيل حمولي انا

ولا هاشيل حملك ؟!

ماعدت أملك شيء..

فيكي.. ولا فيّا

ولا قيراط ولا بيت..

ولا نسمة صافية تلاغي النيل بحرية..

مش باقي مني

غير شوية حب جارحّني

ولا باقي مني

غير شوية ضي ف عينيا

تعليقات

هى قصيدة جميله جدا

واسمعتها
بس مش كامله اظاهر اللى فى الكاست

واخد كنها شوية ابيات

اما حضرتك فكامله جزاك الله خير
جزاكم الله خيرا اخي بلال

على مرورك الكريم وقراءتك لها

الشاعر جمال بخيت والقاءه للقصيده اروع

من سماعها

جزاكم الله خيرا
‏قال sal
الله الله عليك يا ماجد
وعلى اختيارك الرائع

تحياتى وتقديرى
‏قال Haytham Alsayes
انا سمعتها من صوت احمد سعد رائعة
معبرة عن وضعنا السىء
شكرا لك اخي وارجو التواصل
اخي سال

اشكرك على تشجيعك الرائع انا كنت متأكد

من انها ستحوز على اعجابك انت بالذات
--------------------
اخي هيثم السايس

اداء احمد سعد كان جميل

بس القصيده لازم تتسمع كلها لانها فعلا

معبره عن المواجع

اشكرك اخي الكريم على مرورك الكريم

وسنتواصل بأذن الله
‏قال أنا حر
شعر جميل و اله
جزاك الله خيرا
وحشتني متابعتك لمدونتي
‏قال غير معرف…
قصيدة جيدة جدا
شكرا على إعادة نشرها
اخي العزيز انا حر

وانا من امتى ياباشا ما بخشش على مدونتك الحبيبه

اني احبك في الله يااخي

----------------------

اختي سونت

جزاكي الله خيرا على متابعتك الكريمه

ومرورك الجميل على مدونتي المتواضعه
‏قال احمد العبد
فى منتهى الجمال
بارك الله فيك
وفيكي يازمزم

جزاكم الله خيرا
قصيدة رائعة وتحمل معانى قيمة

تحياتى
جزاكم الله خيرا ياامير

على مرورك الكريم على مدونتي المتواضعه

وفقك الله

المشاركات الشائعة من هذه المدونة